Ditën e sotme policia sekuestroi në portin e Durrësit një sasi prej 137 kg kokainë, e cila vinte nga Ekuadori.
Droga ishte fshehur në motorët e frigoriferëve, në katër kontenierë me banane.
Sipas “Balkanweb” autoritetet greke u sinjalizuan për ngarkesën me kokainë nga “DEA” amerikane.
Menjëherë pas marrjes së informacionit, autoritetet helene zëvendësuan kokainën me oriz dhe vendosën brenda pakove GPS.
Pasi mbërriti në portin e Durrësit, skuadra operacionale mbajti nën vëzhgim kontenierët dhe filmoi lëvizjen e personave të dyshuar si pritësit e drogës.
Prokuroria zbuloi se personi kyç në linjën e trafikut ishte Gentian Malindi.
Ky i fundit është pronari i anijes së peshkimit “Anyway”, i cili aktualisht është shpallur në kërkim nga policia.
Ai kishte si bashkëpunëtorë, një nga oficerët e sigurisë në port, Ardian Begën, si dhe punonjësin e anijes, Altin Myslimhaka.
Pasi ngarkuan drogën në një makinë me targa franceze, të tre u nisën drejt “Shkëmbit të Kavajës”.
Ata hapën pakot në një tunel dhe panë se brenda tyre kishte oriz.
Në këtë moment Malindi urdhëron dy të tjerët të mos flasin, pasi në mjet mund të kishte përgjues.
Ndërkohë në dëshminë e tij, Bega mësohet të ketë thënë se ka përdorur dokumentin e tij për të hyrë e dalë nga porti.
Ai gjithashtu pranoi njohjen me Malindin, i cili sipas tij ishte personi që i kërkoi të hapte kontenierët, në këmbim të parave.
Gjykata për Krime të Rënda caktoi sot për Begën dhe Myslimhakën masën e sigurisë “Arrest me burg”.
