Kryetari i Kuvendit, Gramoz Ruçi, ka shprehur sot një mesazh ngushëllimi për ndarjen nga jeta të deputetit Bashkim Fino
Në mesazhin e Ruçit, shkruhej: “Sot u nda nga jeta kolegu ynë, Bashkim Fino. Bashkimi humbi betejën për jetën duke na shkaktuar të gjithëve, familjes, kolegëve, miqve, një humbje të pazëvendësueshme.
Bashkim Fino ishte një ndër njerëzit më të mirë të Shqipërisë, politikan, kryetar bashkie, deputet dhe ministër ndër më të shquarit. Shërbeu me devotshmëri për disa legjislatura si deputet i qarkut Fier dhe fitoi besimin dhe dashurinë e të gjithëve.
Bashkimi i doli zot atdheut si Kryeministër në një kohë të rëndë dhe shërbeu si shtetar dhe patriot gjatë periudhës më të vështirë të tranzicionit. Ishte vëllai, kolegu dhe miku ynë, buzëqeshja e të cilit nuk do të na ndahet përjetë. Lamtumirë, Bashkim, vëllai ynë i dashur dhe i paharruar!”, shkruan në mesazhin e ngushëllimit Kryetari i Kuvendit, Gramoz Ruçi.
Fino u nda sot nga jeta pasi ishte i infektuar me virusin famëkeq të “Covid-19”, ndërsa vuante edhe nga një sëmundje tjetër bashkëshoqëruese. Ish-kryeministri i Shqipërisë ndërroi jetën në moshën 59-vjeçare dhe pas vdekjes së tij, data 29 mars u shpall edhe ditë zie kombëtare nga kryeministri aktual i vendit, Edi Rama.
