Një provë e fortë është gjetur nga Krimet e Rënda, në furgonin në mbishkrimin “hetimi tatimor” që u përdor nga banda kriminale për të realizuar grabitjen spektakolare mesditën e 9 prillit në Rinas, ku u grabitën 6.5 milionë euro.
Sipas “balkaweb” bëhet fjalë për një telefon celular, që mendohet të jetë përdorur nga Admir Murataj, i konsideruar si “truri” i grabitjes, i cili mbeti i vrarë nga policia.
Telefoni është dërguar për ekspertizë me qëllim zbardhjen e çdo komunikimi të realizuar me të.
Kjo rrit mundësinë që hetuesit të mund të identifikojnë edhe bashkëpunëtorët e Muratajt, të cilët janë në arrati.
Në kuadër të hetimit të çështjes, prokurorët zbarkuan në Rinas, ku sekuestruar pranë zyrave të TIA-s, të gjithë praktikat, kontratat apo urdhrat e brendshme, me qëllim përcaktimin e përgjegjësive të secilit institucion.
Hetuesit kanë të dhëna se automjeti, i cili u dogj pak minuta pas ngjarjes, në zonën e Bathores, rezulton se ka qëndruar i parkuar në harkun kohor të pesë ditëve.
Kjo konfirmohet nga pamjet e dy kamerave sigurie në zone si dhe dëshmive të disa banorëve.
Në sitën e hetimit do të kalojnë edhe të dhënat që kanë të bëjnë me momentin e njoftimit të policisë, nëse kompania që siguron perimetrin e brendshëm të aeroportit i ka njoftuar ose jo në kohë uniformat blu.
Kujtojmë që këtë të premte në mesditë, familjarë, të afërm dhe miq i dhanë lamtumirën e fundit Admir Muratajt, i cili do të prehet në varrezat e fshatit Çerem të Tropojës.
