Deri më sot nuk ka pasur një konfirmim të saktë të shumës të parave që u vodhën në Aeroportin e Rinasit në 9 prill, mirëpo sot kemi një shumë zyrtare.
Mësohet se shuma e parave të vjedhura është 6 milionë euro në avionin e “Austria Airlines”.
Kjo shumë është konfirmuar nga 3 banka të nivelit të dytë, të cilat kanë dhënë dëshminë e tyre në Prokurorinë e Krimeve të Rënda.
Ka pasur shumë aludime se sa para janë vjedhur realisht, ku në fillim u përfol për 10 milionë euro, më vonë për 5.7 milionë euro dhe tashmë bëhet fjalë për 6 milionë euro.
Grabitësit në 9 prill mundën që të vidhnin nga avioni partë që ishin për t’u transportuar në Vienë përmes linjës ajrore “Austria Airlines”. 5 grabitës brenda 4 minutave arritën që të vidhnin një shumë të konsiderueshme dhe në përpjekje për t’u arratisur njëri prej tyre mbeti i vdekur dhe bëhet fjalë për Admir Murataj. Pas identifikimit të Murataj është bërë e mundur edhe identifikimi i personave të tjerë ku deri më tani 6 persona ndodhen në qeli si pjesëtarë në grabitje.
Bëhet fjalë për: Oltion Veseli, Alkond Bengasi, Renaldo Sula, Elton Pikli, Saimir Cela dhe Ragip Hajdini.
