Takimi i dytë mes kryeminustrit të Kosovës Albin kurti dhe atij serb Aleksandër Vuçiç, përfundoi sërish pa arritje në kompromis.
Pas takimit, Kurti ka reaguar duke publikuar edhe dokumentin e quajtur “Deklarata e paqes” që iu propozua presidentit serb si formë marrëveshjeje. Ndër të tjera, Vuçiç refuzoi edhe tre librat që Kurti i dha e që përmbanin rrëfime të grave të përdhunuara në Kosovë gjatë luftës e po ashtu listën me mijëra fëmijë të vrarë, 109 prej të cilëve ende nuk janë gjetur.
Kurti bën me dije ishte e pamundur të dilej me një deklaratë të përbashëkt nga takimi dhe se shkak për këtë është bërë togfjalëshi “ballafaqim me të kaluarën” që delegacioni serb nuk pranoi të futej në tekst.
Reagimi i Kurtit:
Në takimin e dytë me delegacionin e Serbisë në Bruksel, sot ofruam një Deklaratë të Paqes me gjashtë nene, të balancuar dhe në gjuhën angleze, e cila flet për zotimin për mossulmim të njëri-tjetrit dhe për reciprocitet të të drejtave. Po ashtu, ofruam edhe dëshmi të 11 shkeljeve që i bën Serbia ndaj Kosovës përmes barrierave kundër tregtisë së lirë e që do të duhej të eliminoheshin. U refuzuan të dyja këto.
Për dallim nga ndërmjetësi Josep Borrell, kryetari i Serbisë nuk i mori tre librat që ia dhashë: rrëfime të grave të përdhunuara në Kosovë gjatë luftës, listën e 1.133 fëmijëve të vrarë prej të cilëve 109 janë ende të pagjetur, dhe librin “Muhaxhirët – Dosja Britanike” për dëbimin e shqiptarëve nga Sanxhaku i Nishit.
Është për të ardhur keq që nuk arritëm të dalim së paku me një deklaratë të përbashkët nga ky takim. Shkaku ishte që delegacioni serb nuk pranoi futjen në tekst të togfjalëshit “ballafaqimi me të kaluarën”.
Serbia si shtet ka ardhur në mesin e popullsisë shqiptare me gjenocid dhe ka ikur me gjenocid. Mosnjohja e së kaluarës së saj kriminale dhe mosnjohja e pavarësisë së Kosovës janë të lidhura ngusht.
Ne vazhdojmë të jemi të përkushtuar për paqe dhe drejtësi, për siguri dhe stabilitet, për demokraci dhe progres. Do të jemi të gatshëm për takime e biseda konstruktive, dhe për dallim nga fqinji ynë verior nuk kemi dilema sa i përket integrimeve evropiane dhe euro-atlantike.
