Goditja nga pandemia/ Ministria e Blendi Klosit ‘mbështet’ me 30 mln lekë subjektet turistike malore

Google+ Pinterest LinkedIn Tumblr +

Pandemia e koronavirusit dhe bllokimi i ekonomisë për disa muaj, dhanë efektet e tyre negative në ekonomi, ku sektori më i goditur ishte pa dyshim ai i turizmit.

Por pavarësisht kësaj, një pjesë e operatorëve turistik në vend, u munduan që të mbijetojnë, falë edhe gjenerimit nga të ardhurat e pakta nga turizmi vendas.

Më të vështirë këtë vit e patën operatorët turistikë të sektorit malor dhe rural, ku mungesa e theksuar e turistëve të huaj dhe atyre që zgjidhnin Shqipërinë për turizmin malor, bëri që shumë operatorë dhe bujtina të shpallnin falimentimin.

Gjatë fazës së tre muajve të verës, kur turizmi në vend gjenerojë pak të ardhura, asnjë masë kontributi konkret ndihme financiare nuk u dha nga ana e qeverisë.

Shumë subjekte private dhe operatorë, ja dolën vetë të mbijetonin, por shumë të tjerë u mbyllën si pasojë e mungesë së klientëve.

Dhe vetëm tani pasi sezoni turistik kaloi dhe dëmet nga pandemia ishin të pallogaritshme, Ministria e Turizmit është kujtuar të çeli disa fonde qesharake për stimulimin e operatorëve të vegjël turistik, veçanërisht të atyre në zonat malore.

Një shumë prej 30 milionë lekësh është vënë në dispozicion të operatorëve turistik, nga Ministria e Turizmit, për të mbështetur produktet e tyre në mbarë vendin, në kuadër të zbutjes së efekteve që ka krijuar pandemia Covid-19.

Sipas thirrjes së shpallur në Qendrën e Botimeve Zyrtare nga Ministria e Turizmit dhe Mjedisit, aplikimet janë të hapura deri me 10 tetor 2020.

“Qëllimi kryesor i mbështetjes financiare është të forcojë konkurrencën dhe qëndrueshmërinë e sektorit të turizmit në Shqipëri, nisur edhe nga situata në të cilën ndodhet industria e turizmit, për shkak të gjendjes së epidemisë të shkaktuar nga pandemia e Covid-19”,- thuhej në sqarimin që jepej për këtë skemë nga ana e Ministrisë së Turizmit.

Duke pasur parasysh këto objektiva kryesorë, Ministria e Turizmit ka saktësuar se, thirrja e këtij viti është e ndarë në dy tematika.

“Së pari promovimin e destinacioneve turistike e të vlerave të veçanta, të produkteve dhe të atraksioneve turistike.

Nën këtë tematikë, Ministria e Turizmit dhe Mjedisit do të bashkëfinancojë projekte që do të synojnë:

– Zgjerimin e aktiviteteve dhe të ofertave turistike, duke synuar forcimin apo krijimin e produkteve të reja turistike, që shkojnë për zhvillimin e vendit dhe përfitimet e mundshme për popullsinë lokale të rajoneve të ndryshme.

– Përfshirjen gjithnjë e më shumë në sektorin e turizmit të komuniteteve lokale, studentëve në promovimin përmes produktit.

Së dyti, në krijimin, zhvillimin dhe përmirësimin e produkteve turistike specifike, në përputhje me kërkesën gjithnjë në rritje për paketa inovative, që ofrojnë përvoja të pazakonta me surpriza dhe ide stimuluese, përveç shërbimeve bazë standarde”.

Sipas të dhënave nga ky dokument, për realizimin e projekteve konkurruese turistike, skema e financimit mbulon deri në 50% të kostove të pranuara e të miratuara, nga Ministria e Turizmit dhe Mjedisit.

Projektet për të cilat kërkohet një financim mbi 50% të fondit buxhetor vjetor, të parashikuar në buxhetin e shtetit, miratohen me vendim të Këshillit të Ministrave.

Financimi nga Buxheti i shtetit nuk mund të jepet më tepër se një herë në vit, për të njëjtin subjekt konkurrues.

Ndërkohë shumë operatorë turistik që këtë verë u detyruan të mbajnë mbyllur aktivitet e tyre, sidomos në zonat malore, për shkak të mungesës së prenotimeve dhe klientëve, e konsiderojnë këtë nismë si tepër të vonuar dhe madje qesharake.

Ata ngrenë edhe shqetësimin e burokracive të shumta nga ana e Ministrisë së Turizmit për të përfituar në rast aplikimi nga këto ngande, të cilat në rast përfitimi janë një shumë simbolike ndihme.

/GazetaReforma.com/

Shpërndaje
Share.

Komento