Sabajet Shuti, 31 vjeç, i njohur si një prej figurave të njohura të grupit kriminal shqiptar “Hellbanianz”, është dënuar me burgim të përjetshëm nga drejtësia britanike për vrasjen e 27-vjeçarit Lumturi Zeqja.
Krimi ndodhi mbrëmjen e 16 tetorit 2022 në Leytonstone të Londrës dhe tronditi rëndë komunitetin shqiptar në Mbretërinë e Bashkuar.
Ngjarja nisi kur Zeqja dhe një mik i tij po qëndronin jashtë një kafeneje në rrugën Church Lane. Dy vëllezërit Shuti, Sabajet dhe Emirlion, mbërritën në zonë me dy makina.
Sipas pamjeve të sigurisë dhe provave të mbledhura nga policia, përplasja nisi me një shkëmbim fjalësh dhe më pas dhunë fizike.
Emirlion Shuti, 30 vjeç, u përfshi i pari në konflikt duke goditur me grusht mikun e Zeqjas, ndërsa Sabajet Shuti nxori një thikë dhe goditi për vdekje Lumturin, duke plagosur edhe mikun e tij. Pas sulmit, të dy vëllezërit u larguan nga vendi i ngjarjes duke e lënë Zeqjan të pajetë në trotuar.
Ekipet e emergjencës mbërritën në vendngjarje, por nuk mundën të shpëtonin 27-vjeçarin. Shoku i tij iu nënshtrua një operacioni urgjent dhe arriti t’i mbijetojë plagëve.
Sabajet Shuti u arratis një ditë pas vrasjes, duke ndryshuar pamjen për të shmangur kapjen. Ai kaloi në Francë përmes Kanalit dhe u fsheh për afro një vit.
Më 3 tetor 2023, u arrestua në Suedi dhe u ekstradua për në Mbretërinë e Bashkuar, ku u vu përballë drejtësisë.
Ndërkohë, Emirlion Shuti u arrestua menjëherë pas krimit dhe u shpall fajtor për rolin ndihmës në konflikt. Ai u dënua me 20 muaj burg për përfshirje në përleshje dhe përshkallëzimin e dhunës që çoi në vrasje.
Hetimet për këtë ngjarje u mbështetën në pamjet e kamerave të sigurisë dhe të dhënat nga telefonat celularë, që ndihmuan në rindërtimin e ngjarjes dhe identifikimin e autorëve.
Sabajet Shuti, i njohur me nofkën “Skilla”, u konsiderua përgjegjësi kryesor i vrasjes dhe mori dënimin maksimal me burgim të përjetshëm.
