Goditja me grusht ndaj kreut të Partisë Demokratike ka ngjallur diskutime të shumta në media dhe jo vetëm. Gazetari Eni Ferhati ka zbuluar detaje të reja për Gert Shehun i cili goditi kreun e Partisë Demokratike, Sali Berishën ditën e djeshme gjatë protestës.
Ferhati është shprehur për “Top News” se agresori kishte një kanal në YouTube ku postonte video në formën e citimeve dhe poezive.
Gazetari ka pohuar se përmbajtjet që ai postonte lidheshin me qeveritarët dhe politikën në vend ndërsa në Tiktokun e tij, Shehu bullizohej nga njerëzit.
“Ditën e djeshme janë komunikuar dy akuza dhe është shtuar akuza e plagosjes së rëndë me dashje. Gert Shehu kishte një kanal të tij në YouTube që postonte video ose citime të cilat ishte krijuar në formë poezie . Ai fliste për politikën për problemet e Shqipërisë, për qeveritarët , për patronazhistët. Ishte kundër të gjithëve. Në tik tok është bullizuar nga njerëzit. Këto janë detaje që kam zbuluar së fundmi”, është shprehur gazetari Ferhati.
Si ndodhi ngjarja:
Gerti Shehu, 31-vjeç sulmoi gjatë protestës së të martës kreun e PD-së Sali Berisha, teksa ky i fundit ishte duke marshuar drejt bulevardit “Dëshmorët e Kombit” për t;ju bashkuar protestës.
31-vjeçari goditi me grusht në fytyrë Berishën duke e gjakosur duke iu shpëtuar vëmendjes së truprojave. Më pas Shehu u godit dhe u dhunua nga protestues dhe mbështetës të Berishës.
31-vjeçari u shoqërua nga policia dhe ndërkohë po merr mjekim në spitalin e Traumës, pasi ka dëmtime në fytyrë dhe fraktura në hundë. Oficerët kanë tentuar dy herë për të marrë në pyetje të riun, por për shkak të gjendjes së tij shëndetësore, ai nuk ka dhënë deri tani asnjë dëshmi. Dyshohet se 31-vjeçari vuan nga probleme të shëndetit mendor. Në lidhje me ngjarjen e rëndë Berisha u shpreh se gjithçka është e organizuar nga Edi Rama.
