Operacioni ndërkombëtar “Alba Tibus” ka çuar në goditjen e një grupi kriminal të strukturuar, të përfshirë në trafikimin e lëndëve narkotike, duke rezultuar në arrestimin e tre personave.
Shtetasit shqiptarë, Anxhelo Ajazaj (27 vjeç), Klarens Dalipaj (30 vjeç) dhe Xhino Hamitaj (30 vjeç), janë kapur në Vlorë dhe akuzohen për pjesëmarrje në këtë grup, i cili kryente trafik kanabisi, kryesisht në Romë, Itali.
Një tjetër anëtar i grupit, Eurel Liçaj, është identifikuar dhe aktualisht po vuan një dënim në burgun e Rrogozhinës.
Operacioni u zhvillua nga Drejtoria për Hetimin e Krimit të Organizuar dhe Forca e Posaçme Operacionale, në bashkëpunim me Policinë e Vlorës dhe autoritetet italiane, përfshirë Karabinierinë e Romës dhe Zyrën e Interforcës Italiane në Shqipëri.
Policia vazhdon hetimet për të goditur më tej krimin e organizuar dhe për të kapur shtetasit që janë shpallur në kërkim ndërkombëtar.
