Kryetari i Kuvendit të Kosovës, Glauk Konjufca, ka ngritur shqetësimin se Serbia mund të përsërisë sulmin e 24 shtatorit në Banjskë, nëse nuk ndëshkohet për agresionin e saj. Në një takim me presidentin e Këshillit Kombëtar të Zvicrës, Eric Nussbaumer, Konjufca theksoi rreziqet që Kosova po përballet për shkak të pretendimeve territoriale serbe dhe bashkëpunimit të vazhdueshëm të Serbisë me Rusinë.
“Një temë e pashmangshme në këto rrethana ishte edhe siguria në Kosovë dhe rreziqet që po përballemi për shkak të pretendimeve territoriale që ka Serbia ndaj Kosovës. Ia shpreha shqetësimet po që se Serbia lihet e pandëshkuar lidhur me agresionin e 24 shtatorit në Banjskë, Serbia ka për ta përsëritur këtë skenarë,” tha Konjufca.
Ai shtoi se Serbia po shkel parimet e marrëveshjes duke mos pranuar Kosovën si shtet dhe duke penguar anëtarësimin e Kosovës në institucionet e BE-së. Ndërkohë, Nussbaumer përshëndeti marrëdhëniet dinamike dhe të fuqishme mes Kosovës dhe Zvicrës, duke theksuar mbështetjen zvicerane për dialogun dhe integrimin evropian të Kosovës.
“Ne kemi pasur një takim të frytshëm, diskutimet tona i kanë theksuar marrëdhënie dinamike dhe të fuqishme. Zvicra është një mbështetëse e vazhdueshme e Kosovës,” tha Nussbaumer.
Kosova dhe Zvicra do të vazhdojnë bashkëpunimin e tyre në fushën e diplomacisë parlamentare dhe në çështjet e sigurisë rajonale.
