Gjykata e Elbasanit ka vendosur masën e “detyrimit për paraqitje” ndaj Denis Hasallës dhe Bledar Çullhajt, dy personave të përfshirë në hetimet për inceneratorin, pasi gjatë kontrolleve në banesat e tyre janë gjetur armë dhe municion.
Denis Hasalla, 35-vjeç, drejtor i kabinetit në Bashkinë e Peqinit dhe vëllai i deputetit socialist Saimir Hasalla, dhe Bledar Çullhaj, 36-vjeç, i cili po ashtu kishte një funksion në Bashkinë e Peqinit, janë nën hetim dhe u ndaluan në kuadër të një operacioni të policisë në qytete të ndryshme të qarkut Elbasan.
Policia kreu 14 kontrolle të koordinuara, gjatë të cilave u sekuestruan armë dhe municion në banesat e tyre. Sipas vendimit të gjykatës, ekzistojnë dyshime të arsyeshme për përfshirjen e tyre në veprime penale, si dhe rreziku që ata të mund të shmangen nga hetimi.
Gjykata nuk ka gjetur arsye që të justifikojnë arrestimin, ndaj dhe ka vendosur detyrim paraqitje.
Operacioni është pjesë e hetimeve që kanë nisur që nga viti 2024, lidhur me një procedim penal që përfshin edhe abuzimet financiare nga kompania “Eco Elb”. Gjykata e Elbasanit zhvilloi sot seancën ku u vlerësuan masat e sigurisë për dy të dyshuarit, ndërsa hetimet vijojnë për zbardhjen e plotë të çështjes dhe përgjegjësive të tyre.
