Agron Tufa, shkrimtar dhe ish-drejtori ekzekutiv i ISKPK (Institutit për Studimin e Krimeve dhe pasojave të Komunizmit në Shqipëri), ka qenë gjithnjë shumë i përfshirë në çështjet publike, që përbëjnë debat.
Tufa shpesh reagon, duke shprehur mendimin e tij mbi pikëpamje të caktuara.
Kjo ka bërë që disa persona të njohur ta sulmojnë atë nëpër shkrime në gazeta apo rrjete sociale.
Kështu, më 1 prill 2019, Spartak Braho, deputet i PS-së, akuzoi Tufën, se po nxin historinë.
Ai tha se Tufa, me punën e tij tek Instituti i Krimeve dhe Pasojave të Komunizmit, po njollos historinë e luftës Nacional-Çlirimtare dhe heronjtë e saj.
Pas kësaj, erdhi reagimi i Tufës, i cili i bëri thirrje drejtësisë të ndërhyjë, pasi sipas tij Braho ka dënuar politikisht gjatë regjimit komunist njerëz të pafajshëm.
Në këtë debat u përfshinë edhe ish-deputetin socialist Sabit Brokaj, poetin Arben Duka dhe ish-ambasadorin Fatos Tarifa.
Më 24 prill 2019, Agron Tufa iu drejtua gjykatës, ku paditi për shpifje Brahon, Brokajn, Dukën dhe Tarifën.
“T’ju gjejnë vendin shpifjeve. Shpifjet ndaj meje për shkak të detyrës. Kam patur presion në rrugë, presion halabak, presion përmes sms-ve. S’jam përzier kurrë me llumin. Kanë 28 ditë front sulm të kuq. Spartak Braho më ka kërcënuar publikisht. Unë kam punët e mia, nuk ia dal dot i vetëm, prandaj kërkova ndihmën e drejtësisë.” -tha Tufa para mediave aso kohe.
Aktualisht Tufa ndodhet në Zvicër, ku ka kërkuar azil politik, pasi është kërcënuar.
Pas 8 muajsh, Gjykata e Tiranës ka pushuar çështjen penale ndaj Spartak Brahos, pasi sipas saj nuk provohet vepra penale për fyerje dhe shpifje, dhe se padia e Tufës nuk përmbush kushtet ligjore.
Pak më parë erdhi edhe reagimi i Tufës mbi këtë vendim.
Përmes një statusi në “Facebook”, Tufa paralajmëron se së shpejti do të depozitojë një sërë padish të reja edhe më të renda, në shkallë të gjerë.
Më tej, ai shkruan se është i vendosur t’i shkoj deri në fund kësaj çështjeje dhe nuk do tërhiqet derisa shteti ligjor të bëhet funksional.
“Le të ngazëllejë për pak gazeta “Transheja e kuqe”, organ i ish-Sigurimit, veglave të tij dhe qenefeve komuniste-enveriste për pushimin e padisë ndaj Braho & co, me shkak procedurat. Së shpejti do të ketë depozitim për një sërë padish të reja edhe më të rënda, në shkallë të gjerë.
Mos t’i rrejë mendja për tërheqje! Jam qytetar dhe do të respektoj ligjet, derisa të bëhet funksional shteti ligjor. Nuk do të mund të më fshihen dot në të drejtën time të ligjshme para drejtësisë!”, shkruan Tufa.
