Gjykatësit e krimeve të luftës të Kombeve të Bashkuara të martën lanë në fuqi një dënim për gjenocid dhe dënim të përjetshëm kundër ish komandantit ushtarak serb boshnjak Ratko Mlladiç, duke hedhur poshtë të gjitha arsyet e apelit kundër vendimit të një gjykate më të ulët.
Mlladiç, 78 vjeç, udhëhoqi forcat serbe të Bosnjës gjatë luftës së Bosnjës 1992-95. Ai u dënua në 2017 me akuzat e gjenocidit, krimeve kundër njerëzimit dhe krimeve të luftës duke përfshirë terrorizimin e popullatës civile të kryeqytetit Boshnjak Sarajevë gjatë një rrethimi 43-mujor dhe vrasjen e më shumë se 8,000 burrave dhe djemve myslimanë në qytetin lindor të Bosnjës Srebrenica në 1995.
Ai ishte dënuar nga gjyqi dhe ishte urdhëruar të vuante burgun e përjetshëm, por apeloi si kundër vendimit ashtu edhe dënimit.
Dhoma e apelit “hedh poshtë ankesën e Mlladiç në tërësinë e saj …, rrëzon ankesën e prokurorisë në tërësinë e saj …, pohon dënimin me burgim të përjetshëm të vendosur ndaj Mlladiç nga dhoma e gjykimit”, thuhej në një përmbledhje me shkrim e vendimit të apelit, bën me dije Reuters.
Rezultati përfshin 25 vjet gjyqe në gjykatën ad hoc Ndërkombëtare të Krimeve për ish Jugosllavinë, i cili dënoi 90 persona.
“Sot është një ditë historike jo vetëm për ne nënat e Srebrenicës por për të gjithë Ballkanin, Evropën dhe botën”, tha Munira Subasic, djali dhe burri i së cilës u vranë nga forcat nacionaliste serbe që pushtuan Srebrenicën, para seancës.
“Kudo ku shkoi ushtria e tij, kudo ku shkeli, ai bëri gjenocid në fshatra, në qytete, në shtëpi … Ai i vrau të gjithë vetëm sepse nuk ishin serbë.”
Gjykatësit e apelit thanë se Mlladiç do të qëndronte në paraburgim në Hagë ndërsa u morën masa për transferimin e tij në një shtet ku ai do të vuante dënimin e tij. Ende nuk dihet se cili vend do ta marrë.
Katërmbëdhjetë vende evropiane kanë marrë të dënuar nga gjykata e OKB për të vuajtur dënimin e tyre deri më tani. Ish udhëheqësi politik serb boshnjak Radovan Karaxhiç u transferua në një burg britanik në maj të këtij viti.
