Drejtori i Përgjithshëm i Agjencisë së Mbikëqyrjes Policore, Florian Sulejmani, është rikthyer në detyrë pas vendimit të Gjykatës së Tiranës, e cila rrëzoi masën e pezullimit ndaj tij, vendosur më herët me kërkesë të Prokurorisë së Beratit.
Prokuroria kishte ngritur ndaj Sulejmanit akuzën për “Shpërdorim të detyrës”, e cila ishte pranuar nga Gjykata e Shkallës së Parë të Beratit. Sipas organit të akuzës, drejtori i AMP-së kishte transferuar oficerë të policisë gjyqësore në kundërshtim me ligjin, duke shkelur nenin 10 pika 1 shkronja “c” dhe nenin 22 të Ligjit nr. 25/2019 “Për Organizimin dhe Funksionimin e Policisë Gjyqësore”, si dhe nenin 62 pika 5 të Ligjit nr. 128/2021 “Për Agjencinë e Mbikëqyrjes Policore”.
Prokuroria argumentoi se ekzistonte një dyshim i arsyeshëm, i mbështetur në prova, për shkeljet ligjore të kryera, si dhe se masat e marra kishin si qëllim mbrojtjen e procesit hetimor dhe garantimin e vërtetësisë së provave.
“Masa e pezullimit ishte e përshtatshme për nevojat e hetimit dhe proporcionalitetin ndaj veprës penale të dyshuar,” njoftoi ndër të tjera Prokuroria e Beratit.
Florian Sulejmani u pezullua nga detyra më 16 prill, por pas shqyrtimit në Gjykatën e Tiranës, ai është rikthyer sërish në krye të Agjencisë së Mbikëqyrjes Policore.
