Gjykata e Sarandës ka caktuar masën e sigurisë “arrest me burg” për 23-vjeçarin Kevi Norra, i akuzuar për aksidentin e rëndë në aksin Sarandë–Delvinë, ku humbën jetën dy motrat Elvisa dhe Rozina Dhimaku dhe mbeti e plagosur rëndë Antonela Zhupa. Vendimi u mor këtë të mërkurë, duke pranuar kërkesën e prokurores së çështjes, Besjana Sadikaj.
Norra, punonjës i Ministrisë së Brendshme, u ndalua menjëherë pas ngjarjes së së dielës në mbrëmje, pasi u konstatua se drejtonte automjetin tip “Audi” në gjendje të dehur dhe me shpejtësi të lartë. Një parakalim i gabuar rezultoi fatal, duke i marrë jetën dy vajzave që udhëtonin me mjetin tip “Lancia” të drejtuar nga Elvisa Dhimaku, ndërsa shoqja e tyre u plagos rëndë.
Tragjedia që goditi familjen Dhimaku tronditi mbarë opinionin publik. Elvisa, 22 vjeçe, dhe Rozina, 20 vjeçe, përveç studimeve, punonin në disa punë të përkohshme për të ndihmuar familjen dhe për të mbledhur para për kurimin e vëllait të tyre 7-vjeçar, i cili vuan prej tre vitesh nga leucemia. Në mbrëmjet e verës, motrat shisnin misra në Sarandë për të mbuluar shpenzimet e trajtimit të tij.
Familjarët e vajzave, mes lotësh, kanë treguar sakrificat e tyre të pafund për të mbajtur gjallë shpresën për shërimin e të voglit. “Dy yje, dy vajza, 22 dhe 20 vjeçe, të dyja studente në Tiranë. Prindërit punëtorë, punonin ditë e natë që ato të studionin. Vajzat shisnin misra për kurimin e vëllait. Tani djali ka mbetur vetëm, pa motrat e tij”, tregoi daja i tyre, Servet Dervishi.
Për familjen, dhimbja është e dyfishtë: humbja e dy bijave të reja dhe frika për shëndetin e djalit të vetëm, i cili nuk është ende në dijeni të tragjedisë. Ai është larguar përkohësisht nga shtëpia, pasi familjarët druhen se lajmi i hidhur mund të përkeqësojë gjendjen e tij shëndetësore.
Ndërsa drejtësia ka vendosur të mbajë në burg autorin e aksidentit, dhimbja e familjes Dhimaku mbetet e pamatë. Dy varre të reja në fshat dhe një fëmijë që lufton për jetën e tij janë dëshmia më e rëndë e një tragjedie të shkaktuar nga papërgjegjshmëria në timon.
