Gjykata e Sarandës ka urdhëruar kthimin për hetime të mëtejshme të dosjes penale ndaj Saimir Kushovës, pronarit të “Spiranca Diving Center”, i akuzuar për shkelje të rregullave të sigurisë në punë që çuan në vdekjen e turistes britanike Rebecca Gannon. Lajmi u konfirmua nga gazetarja Shpresa Dine.
Ngjarja e rëndë ndodhi në vitin 2022 gjatë një zhytjeje turistike në Sarandë. Çështja u trajtua edhe në emisionin “Në shënjestër” të gazetares Klodiana Lala, ku u evidentuan mungesat dhe pasaktësitë në hetimin fillestar të rastit.
Vendimi i fundit i gjykatës i kërkon prokurorisë të thellojë hetimet mbi përgjegjësinë e Kushovës, për të zbardhur plotësisht rrethanat e vdekjes së 29-vjeçares britanike.
Ndërkohë, babai i viktimës, George Gannon, vijon përpjekjet për të kërkuar drejtësi. Në një intervistë për “Daily Mail”, ai ka denoncuar mungesën e reagimit serioz nga autoritetet shqiptare dhe ka zbuluar se pronari i qendrës së zhytjes është dënuar më vonë me 15 vite burg në Norvegji për trafik droge.
“Kam kaluar pothuajse tre vjet në Shqipëri duke kërkuar drejtësi. Ka qenë e vështirë. Kam kaluar kohë larg familjes, por gjithçka që doja ishte që ky njeri të përballej me mua në gjykatë dhe tani ai është burgosur në Norvegji. Ky burrë është përgjegjës për vdekjen e vajzës sime dhe ai duhet të dalë në gjyq,” deklaroi Gannon.
Sipas tij, autoritetet u njoftuan vonë për faktin se Kushova ishte arratisur nga Shqipëria pak kohë pas vdekjes së Rebeccës dhe më pas ishte arrestuar në Norvegji rreth gjashtë muaj më vonë, ku më pas u dënua për kontrabandë droge.
“Ndihet sikur ai po i shpëton drejtësisë, por unë kurrë nuk do të heq dorë nga lufta për të,” shton babai.
Hetimet e mëparshme në Shqipëri kishin çuar në vendimin që Kushova të hetohej në gjendje të lirë me një garanci pasurore prej 1.5 milion lekësh të reja. Ndër shkeljet e evidentuara ishte edhe punësimi i paligjshëm i instruktores së zhytjes, Greta Brozi, si dhe mungesa e kushteve teknike të nevojshme për aktivitetin nënujore.
