Gjykata e Posaçme e Shkallës së Parë për Korrupsion dhe Krimin e Organizuar, ka konfiskuar pasuritë e Moisi Habilajt dhe familjarëve të tij. Gjykata e shkallës së Parë ka marrë vendimin për të konfiskuar 31 pasuritë e Moisi Habilajt. Mësohet se vlera totale e tyre shkon afërsisht 82 milionë lekë.
10 apartamente, 4 ndërtesa, 6 makina, 1garazh, truall, e mijëra euro të tjera pasuri. Panorama ka publikuar listën e pasurive në zotërim të Mosi Habilajt, Florian Habilajt dhe familjarëve të tyre, që Prokuroria e Posaçme, SPAK, në përfundim të procesit gjyqësor pasuror bazuar në ligjin antimafia ka kërkuar që të konfiskohen.
Sipas SPAK, pasuria e konfiskuar kap vlerën e 82 440 285 (tetëdhjetë e dy milionë e katërqind e dyzet mijë e dyqind e tetëdhjetë e pesë) lekë të reja, të ndodhura në Vlorë.
Habilaj është shpallur fajtor për veprat penale “trafikim i lëndëve narkotike e mbetur në tentativë e kryer në formën e grupit të strukturuar kriminal, për të cilën është dënuar me 12 vite burg, si dhe grup të strukturuar kriminal, ku është dënuar me 4 vite.
Me uljen e dënimit sipas kodit të procedurës penale, Habilaj është dënuar përfundimisht me 10 vite burg. Fajtorë për të njëjtat akuza, janë shpallur edhe Nazer Seiti, Maridian Sulaj dhe Fatmir Minaj, të cilët me uljen e dënimit janë dënuar përfundimisht me nga 9 vite burg.
SPAK kërkoi 63 vite burg, nga të cilët 18 vetëm për Moisi Habilajn, por katër pjesëtarët e grupit përfituan ulje nga gjykimi i shkurtuar.Gjykata e Apelit në Katania e dënoi me 15 vite burg Moisi Habilajn duke lenë në fuqi vendimin e shkallës së parë. Që prej fundit të majit, ai ishte në arrest shtëpie pas qëndrimit në burg për gati dy vite.
Moisi Habilaj u dënua qershorin e kaluar me akuzën e trafikut të drogës nga Shqipëria në Itali, ndërsa pak muaj më parë Apeli e la në fuqi. Grupi kryente trafikun e drogës kryesisht nga deti me anë të peshkarexhave.
Kur mbërrinte në Itali droga i shitej disa klaneve mafioze në provincat e Katanias, Sirakuzës dhe Raguzës. Habilaj është përfolur për lidhje farefisnore me ish-ministrin e Brendshëm, Saimir Tahiri.
