Gjykata e Posaçme ka kaluar për gjykim dosjen “5D”, ku janë të pandehur Redi Molla, Mariglen Qato, Taulant Tusha, Enton Punavija, Julian Zanaj, Albano Janku dhe Nestor Muhametllari.
Gjyqtarja Elsa Ulliri ka kërkuar që trupit gjykues t’i shtohen dy anëtarë, pasi të pandehurit kanë kërkuar gjykim të shkurtuar.
Seanca e radhës është caktuar për më 21 shkurt 2024, në orën 12:00.
Më 26 dhjetor të vitit të kaluar, Prokuroria e Posaçme mbylli hetimet ndaj ish-drejtorëve të Bashkisë Tiranë, Redi Molla dhe Mariglen Qato, si dhe bashkëpunëtorëve të tjerë, të cilët akuzohen për korrupsion, fshehje pasurie dhe pastrim parash.
Sipas SPAK, Molla dhe Qato kanë qenë pronarë të shoqërisë “5D Konstruksion” në mënyrë indirekte, duke përdorur persona të tjerë si ortakë fiktivë.
Hetimet zbuluan se nga 2016 në 2020, këta të pandehur kanë përfituar 12 tendera, që kapin vlerën e rreth 2 milionë eurove.
Gjatë periudhës 2016-2018, kur Qato ishte drejtor në UKT, shoqëria “5D” ka fituar 4 tendera në kundërshtim me rregullat e prokurimit publik, nga Bashkia Tiranë, “Tirana Parking” dhe “Klubi Sportiv Tirana”.
Hetimet tregojnë se pagesat janë realizuar përmes faturave fiktive dhe paratë janë depozituar në gjendje cash në arkën e shoqërisë, ose janë përdorur për blerje pasurie.
