Puna për ndërtimin e HEC-eve në Valbonë është pezulluar me vendimin e Gjykatës së Lartë.
Gjykata e Lartë e mori vendimin këtë të martë dhe pranoi kërkesën e banorëve të 27 fshatrave të Bashkisë së Tropojës dhe Shoqatës “TOKA”, Shoqata për Ruajtjen dhe Mbrojtjen e Alpeve Shqiptare që kundërshtuan projektin e ndërtimit të dy hidrocentraleve. Bëhej fjalë për hidrocentralet Dragobia dhe Cerem që do të ndërtoheshin në Parkun Kombëtar të Luginës së Valbonës nga shoqëria koncesionare Dragobia Energy SHPK.
Shoqata e dërgoi kërkesë-padinë në Gjykatën Administrative në vitin 2017, ndërsa vendimi u mor sot në Gjykatën e Lartë për të pezulluar ndërtimin e HEC-eve.
Gjykata pranoi kërkesën paditëse dhe pezullimi i kontratës së koncesionit do të bëhet deri në zgjidhjen përfundimtare të çështjes me vendim të formës së prerë.
“Pranimin e kërkesës së palës paditëse për marrjen e masës së sigurimit të padisë për pezullimin e kontratës së koncesionit dhe shtesave të saj dhe lejeve të përmendura në pikat 3-6 të objektit të kërkesëpadisë, deri në zgjidhjen përfundimtare të çështjes me vendim të formës së prerë”, thuhet në vendimin e Gjykatës.
Kujtojmë se banorët kanë protestuar vazhdimisht kundër ndërtimit të HEC-eve dhe gjithnjë kanë deklaruar se nuk janë përfshirë në konsultime publike për ndërtimin hidrocentraleve.
