Gjykata e Lartë ka rrëzuar kërkesën e ish-kryetarit të Bashkisë Kukës, Safet Gjici, për të shpallur pafajësinë e tij. Institucioni më i lartë i drejtësisë vendosi të mos pranojë rekursin e paraqitur nga Gjici, i cili kërkonte prishjen e vendimit të Apelit të Posaçëm të datës 24 qershor 2024.
Aktualisht, Safet Gjici ndodhet në ‘arrest shtëpie’, pasi më 19 maj u lirua nga qelia për arsye shëndetësore. Ai është dënuar me 3 vite burg për veprat penale të korrupsionit pasiv dhe shpërdorimit të detyrës. Gjithashtu, atij iu hoq e drejta për të ushtruar funksione publike për një periudhë pesëvjeçare.
Çështja në fjalë përfshin edhe Alma Kaçin, e cila u shpall fajtore nga të dyja shkallët e gjyqësorit. Apeli i Posaçëm e vlerësoi ngjarjen si një aferë korruptive. Ndërkohë, për Kaçin u shfuqizua vendimi i shkallës së parë që e kishte dënuar për prostitucion, duke u kualifikuar vepra si korrupsion aktiv. Ajo u dënua përfundimisht me një vit burg.
