Ministrja e Drejtësisë, Etilda Gjonaj ka folur ditën e sotme në Kongresin e jashtëzakonshëm të mbajtur nga Partia Socialiste në stadiumin “Air Albania”. Ministrja Gjonaj ka folur për vizionin ”Shqipëria 2030”, ku ka përmendur edhe dy dosjet më të nxehta si “Gërdeci” dhe “21 janarin”. Në fjalën e mbajtur Gjonaj ka garantuar se drejtësia e vjetër po shembet, dhe po krijohet drejtësia e re rezultatet e para të së cilës janë të prekshme. Ajo ka shtuar se një tjetër fenomen që do të eliminojnë është korrupsioni i sporteleve dhe procedurave burokratike, gjithashtu ka njoftuar se po punojnë për të çuar në një nivel tjetër platformën e bashkëqeverisjes.
“Po shembim drejtësinë e vjetër, dhe po ngremë drejtësinë e re, barazi para ligjit, shpresë dhe besim për qytetarët. Reforma në Drejtësi është realitet. Të gjithë e vlerësojnë pavarësinë reale që i kemi dhënë drejtësisë së re, pastrimin e sistemit nga gjyqtarë e prokurorë të korruptuar e të paaftë. Mbështetjen për institucionet e reja të drejtësisë, për ti bërë funksionale e efiçiente. Arritjet e para kanë filluar të jenë të prekshme. Lajmet te periudhës së fundit janë inkurajuese, tregojnë se drejtësia vonon, por nuk harron. Çështje të harruara si Gërdeci, 21 janari, janë rikthyer dhe do u çohet deri në fund. Do të eleminojë korrupsionin e sporteleve dhe procedurave burokratike. Po punojmë për ta çuar në nivel të ri platformën e bashkëqeverisjes. Çdo punonjës shteti të jetë në marrëdhënie detyruese për të kthyer përgjigje e dhënë shërbimin qytetarit. Do ta çojmë deri në fund, dhe gjatë kësaj dekade do të mbyllim çdo çështje që lidhet me titujt e pronësisë, duke mbyllur problemin e pronave,’’- tha Gjonaj.
