Ministri i Drejtësisë Ulsi Manja ka denoncuar publikisht rastin e parë të futur në “rrjetën” e strukturës anti-Korrupsion. Në një deklaratë nga ministria që ai drejton Manja tha se bëhet fjalë për dy inspektorë të AKU-së në Fier të cilët i kanë vënë gjobë padrejtësisht një qytetari duke përdorur “maskën e shtetit”.
Duke marrë shkas nga denoncimi i një qytetari në Fier, Manja tha se raste të tilla nuk do të lejohen, ndërsa iu bëri thirrje atyre që mos të bien pre e kërcënimeve të inspektorëve që kërkojnë lekë.
Manja shtoi gjithashtu se sot gjobëvënësit me maskën e shtetit , por që nuk e përfaqësojnë shtetit do të përballen me drejtësinë dhe nuk do ta kenë të lehtë
“Procesi anti-korrupsion do të jetë transparent dhe tolerancë zero për këdo që do të na dalë përpara. Qytetarët nuk duhet të kenë frikë të denoncojnë , na kanë në krah sepse nëse zgjatet zinxhiri i heshtjes zgjatet edhe litari. Një qytetar është vendosur në presion nga disa inspektorë të AKU në Fier, por nuk ka rënë pre e presionit. Sot gjobëvënësit me maskën e shtetit , por që nuk e përfaqësojnë shtetit do të përballen me drejtësinë dhe nuk do ta kenë të lehtë. Do të vendoset kallëzim edhe për drejtuesit e tyre. Është shoqëruar dhe me pamje filmike dhe inspektorët janë me emër dhe mbiemër. Uroj që Prokuroria të vendoset në lëvizje”, tha Manja.
