Gjykata e Posaçme Kundër Korrupsionit dhe Krimit të Organizuar ka vendosur masën “arrest në shtëpi” për Pandeli Bozhën, i arrestuar pak ditë pas zgjedhjeve me akuzën e korrupsionit aktiv në zgjedhje.
Sipas hetimeve, ai dyshohet se ka ofruar para dhe një fletë të ngjashme me atë të votimit për të ndikuar një qytetar që të votonte për vajzën e tij, Limonera Bozha, kandidate për deputete në Fier nën siglën e PSD-së së Tom Doshit.
Bozha, i cili njihet edhe me emrin Agim Brahimllari, u arrestua më 12 maj. Në momentin e ndalimit, policia i sekuestroi si shumën e parave të ofruara, ashtu edhe fletën që imitonte modelin e votimit me shënimin portokalli për kandidaturën që duhej votuar.
Masa e lehtësuar “arrest në shtëpi” është dhënë nga GJKKO për shkak të moshës dhe gjendjes shëndetësore të të akuzuarit.
Limonera Bozha, në një deklaratë për mediat pas vendimit të gjykatës, u shpreh se nuk kishte dijeni për veprimet që i atribuohen të atit, duke theksuar se “drejtësia duhet të bëjë punën e saj” dhe se “koha do të tregojë të vërtetën”.
