Sot, në orën 08:30, në Gjykatën e Posaçme për Korrupsionin dhe Krimin e Organizuar do të mbahet seanca për rivlerësimin e masave të sigurisë për tetë të pandehurit e dosjes së Kryetarit të Bashkisë së Tiranës, Erion Veliaj.
Ndaj tij dhe biznesmenit Elman Abule është vendosur masa e sigurisë “arrest në burg”, ndërsa në gjykatë do të jenë të pranishëm edhe pesë biznesmenë të tjerë të dyshuar për bashkëpunim në veprimtarinë korruptive të Veliajt.
Në seancë do të paraqitet edhe bashkëshortja e Veliajt, Ajola Xoxa, ndaj së cilës është caktuar masa e sigurisë “arrest shtëpie”.
Ndërkohë, hetimet për këtë çështje kanë përfshirë edhe deputeten e Partisë Socialiste dhe kryetaren e Komisionit të Ligjeve, Klotilda Bushka, e cila po hetohet për një akuzë të veçantë.
Sipas njoftimit të SPAK, procedimi penal për këtë çështje përfshin disa vepra penale, përfshirë:
- Korrupsioni pasiv i funksionarëve të lartë shtetërorë ose i të zgjedhurve vendorë (kryer në bashkëpunim në 9 raste);
- Korrupsioni aktiv i funksionarëve të lartë shtetërorë ose të zgjedhurve vendorë;
- Pastrimi i produkteve të veprës penale ose veprimtarisë kriminale;
- Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë;
- Deklaratat e rreme përpara oficerit të policisë gjyqësore;
- Veprime që pengojnë zbulimin e së vërtetës.
Gjykata e Posaçme, me kërkesë të Prokurorisë së Posaçme më 24 janar 2025, vendosi masën e sigurisë “arrest në burg” për Erion Veliajn, duke e konsideruar atë si të dyshuar për korrupsion pasiv dhe pastrim parash nëpërmjet fondeve publike të administruara nga Bashkia e Tiranës.
Po ashtu, për Ajola Xoxën është caktuar masa e sigurisë “arrest në shtëpi” për të njëjtat akuza.
Sipas SPAK, hetimet kanë zbuluar se Veliaj dhe bashkëshortja e tij kanë krijuar dhe vënë në funksionim një skemë të qëllimshme për të përfituar në mënyrë të kundërligjshme nga fondet publike, duke i kamufluar veprimet e tyre.
Bazuar në provat e mbledhura, në të paktën 10 raste dyshohet se janë kryer veprime korruptive nga Veliaj, si dhe pastrim i produkteve të veprës penale.
