Apeli i GJKKO ka lënë në fuqi masën ‘pezullim nga detyra’ për numrin dy të OFL-së, Artan Shkëmbi. Avokati i tij, Artan Broci, deklaroi sot se pas seancës së dytë, GJKKO vendosi që të lihej në fuqi kjo masë.
“U la në fuqi masa për pezullim nga detyra. Nuk kanë asnjë provë ndaj Shkëmbit. Shkëmbi nuk ka pasur telefon që të përdorte Encrochat. Shkëmbi ka bërë mbi 170 operacione të suksesshme. Ai vetë është interesuar që të zbardhet e vërteta.”, u shpreh Broci.
Sot ishte seanca e dytë nga kjo gjykatë për Shkëmbin, ku e para u zhvillua dje. Ishte avokati Broci, që një ditë më parë kërkoi të njihej me të gjitha aktet e kësaj dosje.
Ndërkohë SPAK vijon hetimet për këtë çështje. Së fundmi SPAK ka kërkuar të dhëna edhe për dy oficerë të tjerë në Policinë e Shtetit, si të dyshuar të përfshirë në nxjerrjen e sekretit hetimor. Këta dy agjentë janë marrë në pyetje, pasi dyshohet se në bashkëpunim me Shkëmbin kanë kërkuar në TIMS të dhënat e dy personave, që gjermanët kishin kërkuar informacione për pasurinë e tyre. Por, Shkëmbi dhe dy punonjësit e policisë kanë pohuar se kërkimin në TIMS e kanë bërë për shkak të detyrës që ata kishin.
Artan Shkëmbi u pezullua nga detyra më 28 shtator, pasi një vendimi të Gjykatës së Posaçme. Ai akuzohet nga shërbimet gjermane se ka shpërdoruar detyrën duke nxjerrë një sekret hetimor.
/GazetaReforma.com/
