Apeli i Gjykatës së Posaçme ka lënë në burg kryebashkiakun Veliaj. Gjyqtari Engert Pëllumbi ka lënë të pandryshuar masën e sigurisë “arrest në burg” të caktuar ndaj tij. Veliaj kishte kërkuar lirimin nga burgu kundrejt garancisë pasurore.
Pëllumbi ka marrë parasysh kërkesën e prokurorëve të posaçëm Ols Dado dhe Altin Dumani që këmbëngulën në mbajtjen e Veliaj në qeli, pasi sipas tyre vë në rrezik procesin, duke pasur mundësi të prishë provat apo intimidojë dëshmitarët.
Ndërkohë, Apeli i Gjykatës së Posaçme ka ndryshuar masën e sigurisë nga “arrest në burg” në “arrest shtëpie” për biznesmenin Elman Abule, që gjithashtu ka mundësinë të prishë provat e të bëjë manipulime.
Gjyqtari ka lënë të pa ndryshuar masën “detyrim paraqitje” për Shkëlqim Fushën, Gentian Sulën dhe Meriman Palushin.
Fatmir Bektashi, Shkëlqim Fusha, Gentian Sula, Sokol Kryeziu dhe Meriman Palushi – të gjithë të thirrur në SPAK, të gjithë ende të lirë me “detyrim paraqitje”. Një masë sigurie që në praktikë do të thotë: vazhdoni punën tuaj, thjesht nënshkruani një letër çdo javë.
Liria e biznesmenëve u jep atyre mundësinë të vazhdojnë të financojnë media, të menaxhojnë asete të fshehura, të ndihmojnë Veliajn nga jashtë, të vazhdojnë të bëjnë pazare të reja, të sigurojnë koncesione dhe të manipulojnë tendera të tjerë.
