Gjykata e Posaçme ka vendosur sot të lërë në arrest me burg avokatin Radovan Çela, i cili u vetëdorëzua më 5 mars në Policinë e Tiranës, pasi ishte shpallur në kërkim nga SPAK.
Ai dyshohet për korrupsion të gjyqtarëve dhe prokurorëve në dy raste, si dhe për ndikim të paligjshëm në pesë raste.
Çela është i përfshirë në dosjen “Zarka”, ku u arrestua edhe kryeprokurori i Vlorës, Aurel Zarka. Hetimet zbuluan një skemë ndikimi të paligjshëm, ku përfshihen gjithashtu oficerja e Policisë Gjyqësore, Eriona Daupaj, dhe Astrit Vladi, i afërm i të pandehurve në çështjen “Toyota Yaris”.
Avokati ka qenë përfaqësues ligjor i Alfred dhe Elvis Vladit, të arrestuar në vitin 2018 pas sekuestrimit të 3.4 milionë eurove në portin e Durrësit, një çështje e njohur si dosja “Toyota Yaris”.
Kjo dosje fillimisht u hetua nga Prokuroria e Krimeve të Rënda për pastrim parash, por më pas u transferua në Prokurorinë e Tiranës, ku përfundoi me akuzën më të lehtë të “mosdeklarimit të të hollave në kufi”.
SPAK akuzon grupin e përbërë nga Zarka, Çela dhe të tjerët për ndikim të paligjshëm dhe korrupsion, me qëllim favorizimin e të pandehurve në këtë çështje. Ky rast ka ngritur dyshime të forta për përfshirjen e disa gjyqtarëve dhe prokurorëve në një skemë të gjerë korrupsioni.
