Gjykata e Apelit të Posaçëm ka konfirmuar masën e sigurisë “arrest me burg” për Eria Agon, e akuzuar për përfshirje në vrasjen e Fatbardh Licit, krim i ndodhur në vitin 2018.
Eria Ago kishte ankimuar vendimin e GJKKO-së, por Apeli e ka rrëzuar kërkesën e saj, duke lënë në fuqi vendimin e shkallës së parë. Ajo akuzohet për krijimin e kushteve për të kryer vrasje dhe përkrahje të autorit të krimit.
Hetimet e SPAK tregojnë se pas ekzekutimit të Fatbardh Licit, Ago ka ndihmuar në largimin e njërit prej të dyshuarve kryesorë, Astmer Bilalit, duke e sjellë me makinë nga Shkodra në Tiranë. Ndërkohë, Safet Bajri dyshohet se ka qëndruar në Shkodër.
Sipas dosjes hetimore, vrasja ndodhi rreth orës 07:00 të mëngjesit, ndërsa 20 minuta më vonë, një telefonatë mes Astmer Bilalit dhe Eria Agos sugjeron se ajo po drejtonte një automjet tip “Benz” me targë AA 989 TE, i cili shfaqet në vendin e ngjarjes.
Biseda tregon se Bilali ishte në shoqërinë e Safet Bajrit dhe se automjeti tjetër i përdorur për largimin e tij drejtohej nga Ago.
Më 21 shkurt, autoritetet arrestuan Safet Bajrin si një nga të dyshuarit kryesorë, ndërsa pesë ditë më vonë, u prangos edhe Eria Ago. Vendimi i Apelit konfirmon që ajo do të qëndrojë në paraburgim deri në përfundim të hetimeve.