Gjykata e Posaçme e Shkallës së Parë për Korrupsionin dhe Krimin e Organizuar ka vendosur të lërë në burg shtetasin Arsen Caka, i dyshuar për kryerjen e veprave penale “Ndihma për kalim të paligjshëm të kufijve”, “Grup i strukturuar kriminal” dhe “Kryerja e veprave penale nga organizata kriminale”.
Vendimi ka ardhur pas një kërkese të Prokurorisë së Posaçme, e cila kishte kërkuar vazhdimin e masës së sigurimit “Arrest në burg” ndaj Cakës, masë që ishte caktuar më herët në qershor 2024.
Gjykata ka vendosur që Arsen Caka të mbetet në paraburgim dhe të qëndrojë atje në dispozicion të organit të akuzës. Vendimi mund të apelohet brenda 5 ditëve nga data e njoftimit në Gjykatën e Posaçme të Apelit për Korrupsionin dhe Krimin e Organizuar.
