Gjykata e Posaçme Kundër Korrupsionit dhe Krimit të Organizuar (GJKKO) ka shpallur fajtor ish-kryebashkiakun e Himarës, Jorgo Goro, duke e dënuar me 2 vite e 20 ditë burg për shpërdorim detyre. SPAK kishte kërkuar një dënim prej 3 vitesh burg për të.
Gjykata urdhëroi edhe konfiskimin e dy pronave në Dhërmi, me një sipërfaqe totale prej 10 mijë metrash katrorë, që do të kalojnë në favor të shtetit. Ndërsa një apartament i sekuestruar gjatë hetimeve do t’i kthehet shtetasit Gentian Sula.
Sipas akuzës, Jorgo Goro dhe dy ish-drejtorët e Bashkisë Himarë, Jerasimo Bashi dhe Vasillaq Strakosha, janë përfshirë në tjetërsimin e dy pronave në Dhërmi.
Në një rast, ata akuzohen për falsifikim dokumentesh për regjistrimin e një prone prej 5,500 metrash katrorë nga shtetërore në private.
Ndërsa në rastin tjetër, ata dyshohet se ndryshuan vendndodhjen e një prone bujqësore prej 5,000 metrash katrorë dhe e mbivendosën mbi një pasuri shtetërore, për ta shitur më pas te investitorët, duke lehtësuar ndërtimin e një kompleksi turistik.
