Zv. Presidenti i FSHF-së, Arben Dervishaj u shpall i pafajshëm nga GJKKO-ja për akuzat lidhur me aferën e inceneratorit të Fierit, për të cilat u arrestua thuajse një vit më parë. Dyshimet ishin se Dervishaj ka përfituar mbi 740 mijë dollarë ose 744 milionë lekë të vjetra për konsulencën e dhënë për inceneratorët. Sipas raportimeve të mëparshme paratë rezultojnë të jenë marrë në 4 vite të ndryshme, përmes 21 faturave nga 2018-2021, në shuma te ndryshme që variojnë nga 80 milionë lekë të vjetra deri në 313 milionë lekë të vjetra në vit.
Emri i tij doli në skenë në dëshminë që dha në Komisionin Hetimor për Inceneratorët, administratorja e koncesionit të Tiranës, Arjola Kodra. Për të qenë më të saktë, firma “Integrated Energy BV SPV”, ka paguar kompaninë “Ave Consulting” sh.p.k. për konsulencë. Pronari i shoqërisë ‘Ave Consulting’ sh.p.k. është Arben Dervishaj.
Kujtojmë se në seancën e djeshme Arjola Kodra dhe Juri Imeraj, gjithashtu u lanë të lirë, pasi u shpallën të pafajshëm.
Menjëherë pas lirimit të Dervishajt, Presidenti i FSHF-së, Armand Duka, ka shkruar në llogarinë e tij në “Facebook” se ka besuar gjithmonë në pafajësinë e tij. Ai shton se e pret që të vazhdojnë bashkëpunimin në projekte të tjera në të ardhmen.
“Kemi pritur me durim dhe qetësi thuajse prej një viti që drejtësia të thoshte fjalën e saj për një nga kontributorët tanë më të rëndësishëm, zv.presidentin e FSHF e një mik e bashkëpunëtor si inxhinier Arben Dervishaj.
Ne, në FSHF për asnjë moment nuk kemi dyshuar në pafajësinë e inxhinierit me një karrierë të gjatë e kontribute të jashtëzakonshme në shumë prej veprave të ndërtuara në vendin tonë; ashtu sikurse një profesor me autoritet të padiskutueshëm në auditoret universitare.
Si mik, nuk kam dyshuar asnjëherë në pafajësinë e Benit; si personalitet në fushën e tij, shoqëria, politika e drejtësia do të duhet t’i jenë borxhli për burgun e padrejtë që kreu.
Ne në FSHF e mirëpresim sa më shpejt për të vazhduar me dhjetëra projekte infrastrukturore që inxhinier Arben Dervishaj i ka ndjekur me përpikmëri në çdo moment por edhe në sfidat e reja që kemi përpara që kërkojnë ekspertizën, eksperiencën dhe vendosmërinë e inxhinier Benit”, ka shkruar Armand Duka.
