Dyshja Suarez-Messi janë ndër futbollistët më të mirë të kohës dhe miq të ngushtë edhe pse në ekipe të ndryshme.
Këtë sezon uruguajani Luis Suarez shkoi te Atletico i Madridit por kjo nuk i shkëputi marrëdhëniet e tyre dhe kontaktet e vazhdueshme.
Gjatë një interviste për “AS” Suarez tha se me Messin flet shpesh për shumë gjëra dhe se marrëdhënia e tyre është edhe jashtë futbollit.
“Vazhdojmë të flasim shpesh, por flasim për jetën, për atë që ndodh ditët e sotme. Kemi një marrëdhënie të mirë dhe nuk flasim vetëm për futboll. Përpiqemi të mbështesim njëri-tjetrin për çështje personale dhe emocionale”, tregon Suarez.
I ngacmuar nëse do tentonte ta bindte Messin të bashkohej me të tek Atletico Madrid, goleadori shprehet: “Leo është mjaft i pjekur për të marrë vendimet që duhet të marrë. Unë kurrë nuk do t’i kërkoj diçka, përkundrazi.
Gjithmonë do i mbështes zgjedhjet që do të bëjë, për sa kohë ai është i lumtur. Nëse në ndonjë moment mund të paraqitet si mundësi, sigurisht që do t’i them sa i mrekullueshëm është ky klub. Por vetëm nëse ndodh kështu, pasi mendoj se ai duhet të marrë vendimin më të mirë për veten e tij”.
