Kryeministri Edi Rama, ka vizituar Sarandën, ku ka inspektuar punimet në Lungomaren e re në këtë qytet. Me një gjatësi prej 1.1 km, Lungomare do të jetë gati këtë vit për të pritur turistët e parë.
Rama u shpreh se plani për këtë ndërtim të ri në Sarandë duket fantastike, duke u shprehur se me sistemin dhe me pastrimin e zonës së plazhit, turistët do shijojnë më shumë detin.
“ Gjithçka duket fantastike, por ka disa detaje, që me pak punë mund të bëhen dhe njerëzit të mund të shohin detin më mirë, të shijojnë pamjen. Më pëlqejnë edhe gurët me ngjyra që janë vënë këtu. Saranda duket si qytet tjetër në bregdet tani. Bukuri e madhe është, duhet pastrim dhe sistemim.”, thotë Rama.
Ndërkohë kryeministri ka publikuar një foto në rrjete sociale, ku shihet mbi mol dhe poshtë tij në det, është një burrë mbi sërfin e tij, që siç duket po zhvillon dhe një komunikim me kryeministrin.
“PS-ja dhe PD-ja, moment komunikimi me një nga demokratët”, shkruan Rama krahas fotos, duke dashur të krahasojë dy partitë.
Të pranishëm në këtë event ishin kryetari i Bashkisë Sarandë Adrian Guma, drejtuesi politik i qarkut Vlorë Damiian Gjiknuri dhe deputeti socialist Alket Hyseni.
