Atalanta triumfoi 0-3 në Champions League ndaj Shakhtar Donetsk, në ndeshjen e luajtur në Veltins Arena (Gelsenkirchen). Berat Gjimshiti realizoi golin e parë në këtë kompeticion, në minutën e 21-të. Ekipi i Gasperinit dyfishoi shifrat brenda pjesës së parë, me anë të Lookman. Në fillimin e pjesës së dytë, Bellanova thelloi shifrat, duke “vulosur” këtë sukses të rëndësishëm. Ndërkohë, sa i përket Gjimshitit, jo gjithçka ka shkuar mirë për mbrojtësin shqiptar, i cili qëndroi në dhomat e zhveshjes, duke mos u futur kështu në fushë në pjesën e dytë. Sipas asaj që shkruajnë mediat, Gjimshiti ka ndjerë shqetësime dhe trajneri Gasperini vendosi ta zëvendësojë. Analizat mjekësore do të zhvillohen në ditët në vijim, për të kuptuar më pas se për çfarë bëhet fjalë. Tifozët e Atalantës dhe natyrisht ata të kombëtares shqiptare shpresojnë që 31-vjeçari të mos ketë asgjë serioze. Ndeshjet e përfaqësueses janë në prag, me kuqezinjtë që zbresin në fushë pas disa ditësh.
Ndërkohë, një ndeshje me ritëm dhe emocione ishte edhe ajo mes Gironas dhe Feyenoord. Ky takim, përfundoi 2-3 në favor të holandezëve.
