Pas mbarimit të mbledhjes së Këshillit Politik, që nisi që prej orës 17:30 (pas dakordësisë së palëve për t’u ulur në tryezë për paketën e ligjeve), përfaqësuesi i Partisë Socialiste në Këshillin Politik, Damian Gjiknuri doli në një deklaratë për shtyp.
Gjiknuri tha se gjatë mbledhjes nuk patën dakordësi pasi Opozita jashtëparlamentare nuk pranoi që të diskutohej në Këshill çështja e ndryshimeve kushtetuese, ndryshe nga presidenti dhe ndërkombëtarët.
Më tej Gjiknuri tha se Kuvendi ka vijuar një procedurë që nuk e ndalojmë dot, pasi vijimi i dialogut deri në datën e votimit të ndryshimeve kushtetuese është dicka që kërkohet nga ndërkombëtarët.
“Janë disa ndërhyrje për sinjalizuesin dhe në Kodin Penal që rregullojnë disa shqetësime nga opozita në krimin zgjedhor, unë propozova që të vijonim diskutimet edhe për ndryshimet kushtetuese që mundësojnë hapjen e listave. Fatkeqësisht opozita nuk do që kjo cështje të trajtohet në këshill, ndryshe nga sa kërkon presidenti dhe ndërkombëtarët, që para 30 korrikut të kemi mundësi të vazhdojmë diskutimet, pasi Kuvendi ka vijuar një procedurë që nuk e ndalojmë dot.
Nuk patëm dakordësi. Procesi vazhdon. Në përgjigje të thirrjes së partnerëve, por edhe vullnetit të palëve, këshilli politik mund të ishte një forum shumë i mirë, por kjo është cështje politike. Biseda mbetet këtu, miratuan pjesën e ligjeve që u dakordësuam më parë” tha ai.
