Mesfushori i Belgjikës Kevin De Bruyne tha se ai nuk e festoi golin e tij ndaj Danimarkës në ndeshjen e ditës së sotme për respekt për tifozët vendas pas atakut kardiak të Christian Eriksen javën e kaluar.
Lojtarët dhe spektatorët i dhanë nderime Eriksen me një minutë duartrokitje pas 10 minutash në një “Parken Stadium” të mbushur me banderola që tregonin mbështetjen e tifozëve për yllin e Danimarkës, i cili pësoi një arrest kardiak gjatë ndeshjes së tyre të hapjes kundër Finlandës.
De Bruyne, duke bërë paraqitjen e tij të parë në turne pasi u rikuperua nga dëmtimet e fytyrës që pësoi në finalen e Ligës së Kampionëve, zëvnedësoi Thorgan Hazard dhe më pas shënoi një gol fitues në minutën e 70-të.
“Roberto Martinez (trajneri) më futi në lojë duke më kërkuar të krijoja hapësirë. Unë shënova”, i tha RTBF lojtari i Manchester Cityt.
“Por unë nuk doja ta festoja atë gol. Kam shumë respekt për tifozët danezë.”
Fitorja 2-1 dërgon Belgjikën në fazën e eliminimit direkt për Kampionatin e dytë Evropian radhazi.
“Ne mund të jemi të lumtur,” tha De Bruyne. “Ne e dinim se do të kishte momente të vështira kundër Danimarkës dhe para kësaj turme, me gjithçka që ndodhi.”
Belgjika përballet me Finlandën në Saint Petersburg të hënën duke ditur se një pikë do të ishte e mjaftueshme për të siguruar vendin e parë në Grupin B.
