Pandemia e koronavirusit ka goditur ekonominë gjermane. Sipas DW, prodhimi kombëtar bruto ra 10.1 përqind nga prilli në qershor, çka do të thotë se rënia është më e madhe se ajo e krizës financiare të vitit 2008-2009.
Eksportet dhe importet e mallrave dhe shërbimeve ranë ndjeshëm në tremujorin e dytë, njësoj si edhe shpenzimet private të konsumit dhe investimet e sipërmarrjeve në pajisje të tilla si makineritë.
Shumë ekspertë po e konsiderojnë këtë situatë si “recesioni i shekullit” dhe është rënia më e madhe që pas Luftës së Dytë Botërore.
“Tani është zyrtare: recesioni i shekullit,” thotë Andreas Scheuerle nga Dekabank. “Atë që deri tani nuk e arritën as recesionet në tregun e aksioneve ose tronditjet e çmimit të naftës e arriti një krijesë e vogël prej 160 nanometra, e quajtur Corona. Izolimi i urdhëruar nga shteti arriti ta mposhtë këtë virus. Tani fatura është në tryezë.”
130 miliardë euro është paketa stimuluese e përcaktuar nga Qeveria gjermane për vitet 2020-2021, e cila pritet t’i japë një shtysë ekonomisë më të madhe në Evropë.