Një shtetas amerikan është gjetur pa shenja jete ditën e sotme në Tushemisht. Mësohet se personi në fjalë quhet Nabjebul Hasan dhe ishte Indian me shteteësi amerikane dhe se prej vitesh kishte blerë një banesë në zonën e Tushemishtit në Pogradec. Hasan jetonte prej 5 vitesh në Tushemisht duke qenë se mjekët i kishin rekomanduar se klima e kësaj zone i bënte mirë për shëndetin. Në banesën e amerikanit që ishte rreth të gjashtëdhjetave është gjetur edhe një sasi kanabisi që dyshohet se ai e përdorte për qëllime mjekësore.
Në trupin e viktimës nuk janë konstatuar shenja dhune teksa dyshohet se vdekja e tij mund të ketë ardhur si pasojë e një sëmundjeje që e shoqëronte prej kohësh. Ndërkohë, policia po punon për zbardhejn e plotë të ngjarjes dhe zbulimin e shkaqeve të vdekjes.
Njoftimi i plotë i Policisë:
Mëngjesin e sotëm në fshatin Tushemisht, Pogradec, në banesën e tij është gjetur pa shenja jete shtetasi amerikan N. H., 62 vjeç.
Nga kqyrja paraprake e trupit, nuk janë konstatuar shenja dhune dhe dyshohet se ky shtetas mund të ketë gjetur vdekjen nga shkaqe natyrale, pasi ka patur probleme shëndetësore të mëparshme.
Po punohet për të përcaktuar shkakun e vdekjes dhe për të zbardhur rrethanat e ngjarjes.
