Një ngjarje e rëndë është shënuar këtë të premte në zonën e Ujit të Ftohtë në Vlorë, ku një turiste është gjetur e pajetë në apartamentin që kishte marrë me qira vetëm pak ditë më parë.
Sipas informacioneve zyrtare nga Policia e Vlorës, viktima është identifikuar si M. C., 69 vjeçe, me banim në Florida të Shteteve të Bashkuara të Amerikës. Dyshohet paraprakisht se vdekja ka ardhur për shkaqe natyrale, por trupi i pajetë është dërguar në morgun e Spitalit Rajonal të Vlorës për t’iu nënshtruar ekspertizës mjeko-ligjore.
“Policia e Vlorës ka nisur hetimet pasi sot në spitalin e Vlorës dyshohet se ka ndërruar jetë për shkaqe natyrale shtetasja M. C., 69 vjeçe, banuese në Florida. Vijon puna për zbardhjen dhe dokumentimin e plotë të rastit”, thuhet në njoftimin zyrtar të policisë.
Autoritetet po punojnë për të sqaruar të gjitha rrethanat e ngjarjes, ndërsa pritet edhe konfirmimi përfundimtar nga ekspertiza mjeko-ligjore mbi shkaqet e vdekjes.
