Është duke u mbajtur këtë të mërkurë në Gjykatën e Posaçme, seanca e radhës për çështjen Gërdeci, ku ish-ministri i Mbrojtjes Fatmir Mediu, nuk ka qenë i pranishëm. Përveç Mediut, mungonte dhe avokati i tij mbrojtës Ardian Visha, ndërsa në seancë ishte vetëm avokati tjetër Henrik Ligori.
Prokurori Klodian Braho kërkoi që të vazhdojë seanca në mungesë të ish ministrit Mediu, gjë e cila u pranua nga gjyqtarja e çështjes Irena Gjoka. Kjo e fundit vendosi që Mediu të mbrohej në seancën e sotme vetëm nga avokati Ligori.
Gjykata relatoi që në sekretarinë e gjykatës janë paraqitur pyetjet me shkrim për ekspertët, në total 113 pyetje. Ndërkohë në seance nuk është paraqitur një nga ekspertët, Ymer Stafa, i cili kishte njoftuar gjykatën se kishte probleme shëndetësore.
Prokurori Klodian Braho: Nuk ka raport mjekësor për ekspertin që mungon dhe gjendja e tij shëndetësore nuk e pengon që të jetë në seancë. Eksperti të thirret në gjykatë dhe të japë mendimin e tij. Ekspertët të marrin edhe pyetjet e reja dhe të formulojnë një dokument të vetëm. Të kemi edhe ne një kopje të pyetjeve që të jemi të përgatitur në seancë. Ekspertët te marrin kohen e nevojshme
Avokat Henrik Ligori: Është e domosdoshme prania e ekspertit të 5, duhet të gjithë për tu përgjigjur. Të marrin kohën e nevojshme që të realizohet përgjigjja e të gjithëve.
Në seancën e javës së kaluar për çështjen Gërdeci, pati një përplasje mes avokatëve të ish-ministrit të Mbrojtjes dhe gjyqtares së GJKKO, Irena Gjoka. Debatet agravuan deri në pikën që Gjoka urdhëroi përjashtimin e një prej dy avokatëve të Mediut, Ardian Visha për të dalë nga salla.
E gjitha nisi me marrjen në pyetje të 5 ekspertëve: Bexhed Zeqiri, Ymer Stafa, Rasim Metallari, Latif Cela, Mondi Hoxha, të cilët kanë përcaktuar dëmin ekonomik të shkaktuar nga shpërthimi i 15 marsit 2008.
