Policia e Tiranës ka arrestuar një 26-vjeçar, për shpërndarje të lëndëve narkotike.
Në pranga ka rënë i riu me iniciale O.K.
Ky i fundit e shiste lëndën narkotike në zonën e Yzberishtit.
Sapo ka parë efektivët ai ka gëlltitur disa qese me heroinë.
Më pas gjatë kontrollit në banesë e tij, policia gjeti 12 tableta metadon dhe një dorezë hekuri.
Gjithashtu janë arrestuar edhe tre shtetas për vjedhje, dhunë në familje dhe falsifikim monedhash.
Materialet i kaluan Prokurorisë së Tiranës për veprime të mëtejshme.
Njoftimi i policisë
Vijon puna nga strukturat e Drejtorisë Vendore të Policisë Tiranë, për parandalimin, evidentimin dhe goditjen e paligjshmërisë.
Gjatë 24 orëve të fundit, janë vënë në pranga 5 shtetas, si edhe u procedua në gjendje të lirë 1 shtetas tjetër, për vepra të ndryshme penale.
-Nga Komisariati i Policisë Nr. 2, në bashkëpunim me Seksionin për Hetimin e Narkotikëve në DVP Tiranë u arrestua në flagrancë, për veprën penale “Prodhimi dhe shitja e narkotikëve”, shtetasi S. P., 19., vjeç, banues në Tiranë, pasi në rrugën “Andon Zako Çajupi”. Shërbimet e Komisariatit Nr. 2 gjatë kontrollit fizik i kanë gjetur 19 gr. lëndë të dyshuar cannabis sativa. Gjithashtu, u procedua në gjendje të lirë një 16 vjeçar, banues në Tiranë, për veprën penale “Moskallëzimi i krimit”.
-Specialistët për Hetimin e Narkotikëve në Drejtorinë Vendore të Policisë Tiranë bënë arrestimin në flagrancë të shtetasit: O. K., 26 vjeç. Punonjësit e Policisë kanë marrë informacione në rrugë operative se shtetasi O. K. tregtonte lëndë narkotike heroinë në zonën e Yzberishtit, në Tiranë dhe kanë organizuar punën për kapjen e tij. Shtetasi O. K., sapo ka parë punonjësit e policisë, ka gëlltitur disa qese ambalazhi, të cilat dyshohet se kanë qenë me lëndë narkotike të llojit heroinë. Kontrolli ka vijuar edhe në banesën e 26-vjeçarit, ku Policia ka gjetur një përforcues metalik grushti dhe 12 tableta të dyshuara metadon.
-Gjithashtu, nga strukturat e DVP Tiranë janë ndaluar edhe 3 shtetas, pasi ishin shpallur në kërkim, për vepra të ndryshme penale, konkretisht:P. N., 47 vjeç, banues në Tropojë, i shpallur në kërkim për veprën penale “Dhuna në familje”; B. F., 41 vjeç, banues në Tiranë, i shpallur në kërkim për veprën penale “Vjedhja”; N. P., 20 vjeç, banues në Tiranë, i shpallur në kërkim për veprën penale “Falsifikimi i monedhave”;
Materialet hetimore i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
