Gazetari i kronikës, Xhevahir Zhabina, ka zbuluar detaje të reja mbi aktivitetin kriminal të bandës së drejtuar nga Suel Çela në Elbasan.
Sipas tij, Suel Çela, i konsideruar si një nga figurat më të “zgjuara” të krimit në Shqipëri, përdor korrupsionin në nivel lokal për të mbrojtur anëtarët e grupit nga drejtësia dhe për të ruajtur ndikimin e tij.
Zhabina theksoi se banda kishte tre objektiva kryesorë për eliminim: Ardjan Çapja, Bledar Muça dhe Elvis Korçari. Për ekzekutimin e Ardjan Çapjas, grupit iu deshën dy vite për ta survejuar dhe identifikuar lëvizjet e tij. Megjithatë, plani dështoi dhe Çapja shpëtoi.
Një tjetër objektiv, Bledar Muça, i njohur si një figurë kyçe në trafikun e drogës dhe i vendosur në Belgjikë, ishte në qendër të vëmendjes së bandës. Për eliminimin e tij, grupi i Suel Çelës ishte gati të paguante deri në 500 mijë euro.
Një tentativë për ta vrarë në Elbasan dështoi kur Muça nuk mbërriti në vendin e përgatitur për ekzekutim.
Edhe për Elvis Korçarin, banda kishte ndjekur një plan të detajuar. Ata survejuan lëvizjet e familjes Çapja, por tentativa për ta ekzekutuar Korçarin, i cili mendohej se ndodhej bashkë me Çapjan në një ambulancë, nuk u finalizua.
Në lidhje me përfshirjen e Bujar Shegës, Zhabina sqaroi se ai është i rëndësishëm në trafikun e narkotikëve, por funksionon si një figurë më e pavarur nga organizata e Çelës.
