Arratisja e Dritan Dajtit nga gjykata në vitin 2003, ka qenë një nga ngjarjet që ka bërë më shumë bujë në atë kohë, aq shumë sa edhe sot vazhdon e komentohet.
Kështu sot nga studio e “Opinion”, gazetari Artan Hoxha e ka sjellë edhe një herë në vëmendje arratisjen, duke dhënë edhe një version të tijin se si kanë rrjedhur ngjarjet.
Sipas Hoxhës, historia e arratisjes ishte kjo:
“Ditën e 17 nëntorit, një oficer i policisë kriminale ka futur në tualetin e gjykatës një pistoletë. Dritan Dajtin e ka sjellë toga. Ai ka pasur një xhup që vishej në të dy krahët. Dhe në momentin që ka hyrë në gjykatë policët e togës ishin shumë të vjetër. Ka kërkuar të shkojë në tualet. Ka marr pistoletën. Në korridor u ndesh me prokurorin. Aty ka pasur një tentativë për ta ndaluar brenda ambienteve. Është qëlluar në ajër dhe kur ka dalë jashtë një punonjës ka tentuar ta ndalojë. Ndërkohë përballë gjykatës ka pasur të shtëna për të tërhequr vëmendjen. Sa ka dalë i është lënë një motor i ndezur, vendosur në sens të kundërt qarkullimi. Policia ka shkuar pas të shtënave, ndërsa ai u largua me motorë. Ai ka ardhur para drejtorisë së policisë Tiranë, është futur në një tunel aty dhe ka qëndruar 1 muaj në një banesë, duke ndjekur në radio çdo lëvizje, sepse kishte radio policie”.
