Vizita e presidentit ukrainas Volodymyr Zelensky në Shtëpinë e Bardhë nisi me pritjen ceremoniale të zakonshme, por përfundoi me një përplasje të paprecedentë para syve të gazetarëve.
Fillimisht, atmosfera ishte e qetë dhe diplomatike. Zelensky i dhuroi Trumpit rripin e kampionit të boksierit ukrainas Oleksandr Usyk, ndërsa presidenti amerikan e komplimentoi për veshjen.
Megjithatë, situata ndryshoi drastikisht kur Trump dhe zëvendëspresidenti JD Vance e akuzuan Zelenskyn se nuk kishte treguar mjaftueshëm mirënjohje për ndihmën që SHBA-ja i kishte dhënë Ukrainës.
Toni i bisedës u ashpërsua kur Vance i kërkoi Zelenskyt që të falënderonte Trumpin për mbështetjen. Presidenti ukrainas reagoi me nervozizëm, duke theksuar se ai nuk po luante “letra”, por po luftonte për vendin e tij.
“Ke folur mjaftueshëm. Nuk e fiton dot këtë debat” i tha Trump në një moment. “Duhet të jesh mirënjohës. Nuk i ke letrat.”
“Unë nuk jam duke luajtur letra,” u përgjigj Zelensky. “Unë jam shumë serioz, zoti President. Unë jam presidenti në një luftë.”
“Ju jeni duke luajtur kumar me Luftën e Tretë Botërore,” u përgjigj Trump. “Dhe kjo që po bëni është shumë mungesë respekti për vendin, këtë vend, që ju ka mbështetur shumë më tepër se sa shumë njerëz thanë se duhet të kishin.”
Vance iu përgjigj: “A keni thënë “faleminderit” një herë në këtë takim? Jo.”
Përplasja kulmoi kur Vance e pyeti Zelenskyn nëse kishte falënderuar ndonjëherë gjatë takimit, duke nënkuptuar se ai nuk kishte shprehur mirënjohje.
Gazetarët dhe diplomatët në dhomë mbetën të shokuar nga shkëmbimi i ashpër i fjalëve.
Pas kësaj përplasjeje, Trump anuloi konferencën për shtyp dhe ceremoninë e nënshkrimit të marrëveshjes mbi burimet minerale mes SHBA-së dhe Ukrainës. Ai më pas postoi në Truth Social se Zelensky “mund të kthehet kur të jetë gati për paqe.”
Pavarësisht debateve, mbetet e paqartë nëse marrëveshja do të realizohet në të ardhmen. Megjithatë, kjo vizitë e Zelensky në Shtëpinë e Bardhë nuk do të mbahet mend për negociata, por për përplasjen e ashpër mes liderëve.
