Agjencia civile e drejtuar nga Hamasi ka njoftuar se qyteti i Gazës po sulmohet intensivisht nga ajri, ndërsa forcat izraelite përgatiten për një operacion për të marrë kontrollin e qytetit.
Zëdhënësi Mahmud Bassal raportoi se zonat rezidenciale të Zeitoun dhe Sabra janë goditur për tre ditë radhazi, duke shkaktuar “shkatërrim masiv të shtëpive të civilëve”, ndërsa banorët nuk kanë mundur të gjejnë të vdekurit dhe të plagosurit.
Një deklaratë e përbashkët e Mbretërisë së Bashkuar, BE-së, Australisë, Kanadasë dhe Japonisë paralajmëroi se “uria po përhapet përpara syve tanë” dhe kërkoi veprime të menjëhershme për të lehtësuar hyrjen e ndihmave humanitare në Gaza.
Ata kërkuan masa konkrete dhe të qëndrueshme për të siguruar shpërndarjen e ndihmave, duke akuzuar gjithashtu përdorimin e forcës pranë konvojve humanitare. Sipas OKB-së, mbi 1,300 palestinezë janë vrarë kryesisht nga ushtria izraelite.
Organizata Botërore e Shëndetësisë bëri thirrje të martën që Izraeli të lejojë furnizime mjekësore, për të përballuar një krizë shëndetësore “katastrofike” përpara kontrollit të Qytetit të Gazës. Përfaqësuesi i OBSH-së, Rik Peeperkorn, tha se shpërndarja e furnizimeve po ndodh me ritëm të ngadaltë dhe se spitalet duhet të pajisen me ilaçe dhe materialet e nevojshme sa më shpejt të jetë e mundur.
Kabineti i luftës i Izraelit votoi të hënën për marrjen e kontrollit të Gazës, një vendim që u dënua në një mbledhje urgjente të Këshillit të Sigurimit të OKB-së. Të martën, Forcat Mbrojtëse të Izraelit, deklaruan se ishin “në fillim të një gjendjeje të re luftarake”, pa dhënë një afat të saktë për hyrjen e forcave në qytet.
Kryeministri Benjamin Netanyahu tha se forcat izraelite ishin të udhëzuara të çmontonin “dy fortesat e mbetura të Hamasit” dhe të kontrollonin zonën qendrore të al-Mawasit, duke parashtruar një plan me tre hapa për rritjen e ndihmave humanitare dhe krijimin e korridoreve të sigurta.
Banorët raportojnë se sulmet ajrore kanë qenë intensive dhe të pandërprera. Majed al-Hosary nga Zeitoun tha për AFP se “sulmet ishin jashtëzakonisht intensive për dy ditë”, ndërsa Amr Salah, 25 vjeç, për Reuters, përshkroi bombardimet dhe “unazën e zjarrit” që goditi rrugët e Gazës lindore.
Ministria e Shëndetësisë e kontrolluar nga Hamasi raportoi 100 të vdekur në 24 orët e fundit, përfshirë 31 persona që humbën jetën pranë vendeve të shpërndarjes së ndihmave, si dhe pesë viktima nga kequshqyerja.
Lufta 22-mujore mes Izraelit dhe Hamasit ka nxitur kritika të shumta ndërkombëtare, me ekspertë të OKB-së që paralajmërojnë për një krizë ushqimore të gjerë. Një grup ish-udhëheqësish ndërkombëtar, i njohur si “Pleqtë”, e ka cilësuar situatën në Gaza si “gjenocid në zhvillim”, duke fajësuar Izraelin për shkaktimin e uri masive.
Helen Clark dhe Mary Robinson, ish-kryeministre e Zelandës së Re dhe ish-presidente e Irlandës, pas vizitës në kufirin e Gazës, deklaruan se situata tregon për një gjenocid të vazhdueshëm, jo vetëm për një krizë ushqimore të shkaktuar nga njeriu.
