Kryeministri i vendit Edi Rama, ka zhvilluar ditën e sotme takimin e radhës me të rinjtë që ndodhen jashtë vendit dhe duan të rikthehen dhe të punojnë në Shqipëri. Rama ndër të tjera ka theksuar se të gjithë të rinjtë që kanë aplikuar dhe duan të kontribuojnë për Shqipërinë, do të lidhen me ministrat.
“Më vjen mirë që kemi një numër shumë më të madh se çfarë e prisja, njerëzish si ju që kanë interes për të kontribuar dhe kanë kurajon për ta bërë këtë gjë në sensin që nuk ia lënë fjalës se atje s’të përfill njeri, s’të hap derën njeri, pavarësisht se kjo mund të jetë e vërtetë në raste të caktuara sepse për fat të keq ndodhin dhe këto”, tha Rama, në sesionin e gjashtë të takimit me të rinjtë.
Gjithashtu kryeministri i vendit Edi Rama, iu ka dhënë një këshillë të rinjve që jetojnë jashtë vendit. Kryeministri tha se iu uronte çdo të mirë dhe: “të bëjnë pak qejf”, sepse jeta nuk është vetëm shkollë edhe punë.
“Ju uroj çdo të mirë, mos harroni të bëni pak qejf se nuk është vetëm punë dhe shkollë jeta. Të merreni me familjen dhe atë që u do zemra”, e përfundoi këtë mbledhje online kryeministri i vendit Edi Rama.
