Ditën e sotme Operacioni Forca e Ligjit (OFL), i ka dërguar formularin e vetëdeklarimit të pasurisë, shtetasit Shkëlzen Dumani, i cili kishte shkuar në Siri nën thirrjen e luftës së shenjtë (xhihadid) dhe i ishte bashkuar ISIS-it, ku edhe rezulton i vrarë prej 6 vitesh që në vitin 2014.
Sipas të dhënave, pasuria e të ndjerit është një apartament dhe një automjet, ndërsa në banesën e tij pas vdekjes së nënës së tij Mentije Dumanit, nuk jeton më askush.
Kujtojmë se Shkëlzen Dumani u vra në moshën 39 vjeçare krah grupeve xhihadiste në Siri, si dhe u varros në tokën ku luftoi sipas riteve fetare islame.
Sipas njoftimit të OFL, Shkëlzen Dumani është banues në Tiranë, ndërsa gjykata e shkallës së Parë për Krimet e Rënda ka caktuar masën e sigurisë “Arrest me burg”, pasi dyshohet se ka kryer veprat penale “Rekrutimi i personave me qëllim kryerjen e veprave terroriste”, “Nxitja, thirrja publike dhe propaganda për kryerjen e veprave me qëllime terroriste” dhe “Nxitja e urrejtjes ose e grindjeve”.
Ndërkohë kunati i të ndjerit i ka bërë thirrje shtetit shqiptar, që ta ndihmojë që të kthejë fëmijët e të ndjerit në Shqipëri, pasi Eva dhe Endri, kanë mbetur në kampet siriane që pas vdekjes së babait të tyre, Shkëlzen Dumanit.
Kush është Shkëlzen Dumani?
Shqiptari i fundit i cili besohet se është vrarë në Siri, Shkëlzen Dumani, është një prej personave të shpallur në kërkim nga drejtësia shqiptare me akuzën e organizimit dhe financimit të rekrutimit dhe dërgimit të myslimanëve shqiptarë për xhihad në Siri.
Në fund të janarit të vitit 2014, ai ka mundur të kalojë kufirin së bashku me dy fëmijët e tij, Endri dhe Eva, përkatësisht 8 dhe 9 vjeç. Sipas të afërmve në Bellovë të Dibrës, vite më parë, Shkëlzeni me profesion hidraulik shkoi për gjashtë muaj në Arabinë Saudite me kontratë pune.
Pas kthimit nga Arabia, ai fillon të praktikonte fenë myslimanë duke lënë dhe mjekër.
Shkëlzen Dumani duket se e ka menduar me detaje arratisjen së bashku me dy fëmijët e tij.
Ai ka shfrytëzuar një sebep familjar të bashkëshortes për të kryer në heshtje largimin e tij. Ai i ka thënë bashkëshortes, Mides, të ikte tek i vëllai i saj, pasi ky i fundit fejonte të bijën dhe i ka kërkuar të qëndronte tre ditë atje.
Ai së bashku me dy fëmijët të nesërmen do të ikte në Shkodër për të drekuar me një mikun e tij. Gjatë kësaj kohe ai është bërë gati dhe është nisur në aeroport me fëmijët. Teksa është telefonuar nga bashkëshortja, ai deri në momentin që kanë humbur kontaktet, i është përgjigjur se po ia kalonin mirë dhe se fëmijët janë po ashtu mirë.
Dumani ka udhëtuar me fëmijët e tij përmes aeroportit të Rinasit me destinacion Turqinë. Mësohet se ditën e udhëtimit Dumani ka qenë i veshur me kostum dhe ka hequr mjekrën.
Ai i ka shpjeguar personelit se arsyeja e udhëtimit drejt Turqisë është për operimin e djalit të tij. Më pas i ka humbur gjurmët dhe dyshohet se ka mbërritur në Siri së bashku me dy fëmijët.
