Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka përfunduar hetimet dhe ka çuar për gjykim pesë shtetas kosovarë, të akuzuar për kontrabandë me mallra të licencuara, në bashkëpunim.
Të pandehurit Altin Maqastena, Bekim Zenuni, Andi Grabanica, Ardian Ismajli dhe Ferat Zenuni akuzohen se në dhjetor të vitit 2024 kanë hyrë në Shqipëri përmes aeroportit të Rinasit me një sasi të konsiderueshme parash dhe medikamentesh, pa autorizim dhe pa deklarim në doganë.
Sipas dosjes hetimore, pas njoftimit nga Drejtoria e Përgjithshme e Doganave dhe gjatë një kontrolli fizik, në posedim të tyre u gjetën 300 mijë euro cash dhe 14 valixhe me gjithsej 1,057,840 medikamente me mbishkrimin “Unified”, me peshë totale 417.1 kg.
Mallrat u sekuestruan menjëherë nga autoritetet doganore dhe Policia e Rinasit, pasi rezultoi se medikamentet nuk kishin lejet përkatëse për tregtim, përdorim apo kontroll të lëshuar nga Agjencia Kombëtare e Barnave dhe Pajisjeve Mjekësore, sipas ligjit nr.105/2014 “Për barnat dhe shërbimin farmaceutik”.
Hetimet provuan se veprimtaria kriminale është kryer në bashkëpunim nga të pesë personat dhe përbën vepër penale të kontrabandës me mallra të licencuara, e parashikuar nga neni 173/2 i Kodit Penal.
Prokuroria kërkon ndjekjen penale të tyre dhe referon çështjen për gjykim, në mbështetje të nenit 331 të Kodit të Procedurës Penale.
