Deputeti i Partisë Socialiste, Erjon Braçe, nuk kurseu ironitë gjatë fjalimit të tij në Kuvend, teksa diskutoi për marrëveshjen e pensioneve me Italinë. Ai tha se kjo është një çështje shumë e ndjeshme dhe një marrëveshje për një të drejtë themelore.
“Nuk po i bëjmë nder italianëve që jetojnë këtu, as Italia nuk po i bën nder shqiptarëve që jetojnë atje,” tha Braçe. Ai shtoi se opozita ka folur shumë për furgonat që shkuan në Greqi për takimin e kryeministrit Rama, por nuk ka reaguar kur shqiptarët trajtohen si bujq në Greqi dhe nuk pajisen me dokumente apo pensione.
Braçe theksoi se pensionet janë një çështje shumë e ndjeshme dhe prekin shumë njerëz. Ai kritikoi populizmin, duke thënë se është e lehtë të flasësh për pensionet në Kuvend, por e vështirë është t’i çosh paratë në xhepat e pensionistëve.
“Duhet të kthehemi në atë që është reale dhe në atë që ai brez që ka kontribuar aq shumë, meriton,” tha ai. Braçe theksoi rëndësinë e një skeme kontribuese dhe kritikoi ata që e quajnë kontributin një taksë socialiste.
Ai gjithashtu kërkoi një marrëveshje me Greqinë për të siguruar të drejtat e shqiptarëve që kanë jetuar dhe punuar atje për shumë vite. “Pse nuk reagoni për këtë çështje, pse e keni të vështirë të reagoni që shqiptarët të pajisen me dokumente dhe pensione që është një e drejtë themelore për ta?” përfundoi Braçe.
