Sot, Federata Shqiptare e Futbollit (FSHF) mirëpriti një turne futbolli të veçantë me ambasadat, në kuadër të 10-vjetorit të Procesit të Berlinit.
Aktiviteti, i zhvilluar në “Shtëpinë e Futbollit” nën sloganin “Miqësi përmes Futbollit – Edicioni i Ballkanit Perëndimor”, solli përballë gjashtë skuadra: “Diplomatic League”, “WBF + RYCO”, skuadra e Ministrisë për Evropën dhe Punët e Jashtme të Shqipërisë, Skuadra e Ambasadës Gjermane në Shqipëri, Skuadra e Ambasadës Gjermane në Kosovë dhe Skuadra e Administratës së FSHF-së.
Në këtë ngjarje morën pjesë Presidenti i FSHF-së, Armand Duka, Ambasadori Gjerman në Shqipëri, Karl Bergner, Ambasadori Gjerman në Kosovë, Joern Rohde, si dhe përfaqësues të tjerë të institucioneve.
Presidenti Duka, në fjalën e tij, falënderoi të gjithë të pranishmit dhe theksoi rëndësinë e futbollit si një mesazh pozitiv miqësie dhe edukimi për shoqërinë.
Ai gjithashtu falënderoi ambasadorët gjermanë për mikpritjen e jashtëzakonshme të ekipit kombëtar dhe tifozëve shqiptarë gjatë Euro 2024 dhe nënvizoi gatishmërinë e FSHF-së për çdo bashkëpunim që ndihmon edukimin e fëmijëve dhe përmirësimin e jetës në Shqipëri.
